क्याम्ब्रियन पट्रोल अभ्यासमा नेपाली सेनालाई रजत पदक

काठमाडौँ । प्रधान सेनापति महारथी प्रभुराम शर्माले संयुक्त अधिराज्यको वेल्स ब्रेकनस्थित सेनीब्रिज ट्रेनिङ एरियामा सञ्चालन भइरहेको प्रतिस्पर्धात्मक क्याम्ब्रियन पट्रोल अभ्यासमा सहभागीहरूलाई पद तथा प्रमाणपत्र वितरण गरेका छन् ।

अभ्यासमा नेपाली सेना लगायत क्यानडा, मेसोडोनिया, कतार, फिलिपिन्स र बेलायती सेनाका टोलीहरूलाई आइतबार आयोजित कार्यक्रमबिच पदक तथा प्रमाणपत्र वितरण गरिएको नेपाली सेनाले जानकारी दिएको छ ।

गत असोज १९ गते आरम्भ भएको सो प्रतिस्पर्धात्मक अभ्यासमा सहभागी नेपाली सेनाको टोलीले रजत पदक प्राप्त गरेको छ । विशेष गरी पैदल फौजको पेसागत ज्ञान, सीप, रण कौशल, शारीरिक सहिष्णुताका साथै व्यक्तिगत एवं सामूहिक रूपमा गरिने फौजी कारबाहीको स्तर जाँच तथा मूल्याङ्कन गरिने उक्त अभ्यासमा भाग लिने टोलीले ४८ घण्टाको समयावधिभित्र हतियार तथा ३२ के।जी। तौल बराबरको उपकरण एवं बन्दोबस्ती सामाग्रीसहित करिब ६५ किलोमिटरको दुरी पुरा गर्नुपर्दछ ।

अभ्यासमा ७५ प्रतिशत भन्दा बढी अङ्क प्राप्त गर्ने टिमलाई स्वर्ण पदक, ६५ देखि ७४.९ प्रतिशत अङ्क प्राप्त गर्ने टिमलाई रजत पदक र ५५ देखि ६४.९ प्रतिशत अङ्क प्राप्त गर्ने टिमलाई कांस्य पदक प्रदान गरिन्छ ।

सन् १९६० बाट वार्षिक रूपमा बेलायतमा सञ्चालन हुँदै आएको अन्तर्राष्ट्रिय स्तरको यस प्रतियोगितामा नेपाली सेनाले सन् २०१४ बाट भाग लिँदै आइरहेको छ । यस वर्षको अभ्यासमा विभिन्न ३१ राष्ट्रका ३८ वटा अन्तर्राष्ट्रिय टिमका साथै कुल १११ वटा टिम सहभागी छन् । हालसम्म नेपाली सेनाको टोलीले उक्त प्रतिस्पर्धात्मक अभ्यासमा स्वर्ण-२, रजत-३ र कांस्य-२ गरी कुल ७ पदक प्राप्त गरिसकेको छ ।