नेपाल विद्युत् प्राधिकरणद्वारा देशका विभिन्‍न ठाउँमा निर्माण गरेका ५१ वटा चार्जिङ स्टेसन सञ्चालन

काठमाडौँ — नेपाल विद्युत् प्राधिकरणले देशका विभिन्‍न ठाउँमा निर्माण गरेका ५१ वटा चार्जिङ स्टेसन सञ्चालनमा आएका छन् । ऊर्जा, जलस्रोत तथा सिँचाइमन्त्री शक्तिबहादुर बस्नेत र सचिव दिनेशकुमार घिमिरेले यी चार्जिङ स्टेसनको संयूक्त रुपमा उद्घाटन गरे ।

प्राधिकरणको लगानी र एसियाली विकास बैंकको सहुलीयतपूर्ण ऋण तथा नर्वे सरकारको प्राविधिक सहयोगमा विद्युतीय सवारी चार्जिङ पूर्वाधार विकास आयोजना अन्तर्गत सात प्रदेशका मुख्य राजमार्ग, बसपार्क र ठूला सहरहरुमा ५१ वटा विद्युतीय चार्जिङ स्टेसन सञ्चालनमा आएका हुन् । यी स्टेसनबाट सवारी साधन छिटो चार्ज गर्न मिल्ने प्राधिकरणले जनाएको छ ।

करिब ४० करोड रुपैयाँ लागतमा निर्माण गरिएका चार्जिङ स्टेसनमध्ये २६ वटामा ठूला बस, माइक्रो, ट्रक, पिकअप तथा कार र २५ वटामा साना/ ठूला कारहरु चार्ज गर्न मिल्ने छन् । प्राधिकरणका अनुसार चार्ज गर्दा प्रतिकिलोमिटर दूरीका लागि कारहरुमा औसत ७० पैसा, एसयूभीहरुमा ८० पैसा, माइक्रोबसमा ९० पैसा र बसहरुमा १ रुपैयाँ २० पैसा खर्च लाग्छ । नेपालमा उपलब्ध सवारी साधनहरुमा रहेको ब्याट्री क्षमता अनुसार कम्तीमा आधा घण्टादेखि १ घण्टासम्ममा चार्ज पूर्ण हुन सक्ने प्राधिकरणले जनाएको छ ।

हरेक चार्जिङ स्टेसनमा १४२ किलोवाट क्षमताको चार्जर, त्यसमा विद्युत् आपूर्तिका लागि ५० केभीएको ट्रान्सफर्मर, अनलाइन विलिङ प्रणालीको जडान गरिएको छ । चार्जिङ स्टेसनमा छिटो चार्ज गर्न मिल्ने ६०/६० किलोवाटका डीसी र २२ किलोवाटका एसी चार्जरहरु राखिएका छन् । यसबाट ठूला बससहित तीन वटा सवारी साधन एक साथ चार्ज गर्न सकिने छ ।

उद्घाटन अवसरमा मन्त्री बस्नेतले विद्युतीय सवारी साधनहरुको प्रवर्द्धन र विस्तारको लागि आवश्यक सहुलियत प्रदान गर्न र अनुकुल वातावरण बनाउन सरकार तयार रहेको बताए । आगामी दिनमा देशव्यापी रुपमा चार्जिङ स्टेसन विस्तार हुने उनको भनाइ छ ।

‘विद्युतीय गाडी (ईभी)मार्फत नै हरित र दिगो विकासमा महत्त्वपूर्ण योगदान गर्नसक्ने विश्वास लिएका छौं’ मन्त्री बस्नेतले भने ‘विद्युतीय सवारी साधनहरुले जलवायु परिवर्तनबाट उत्पन्न भएको समस्या न्यूनीकरणमा महत्त्व राख्छ । सँगै नेपालको आर्थिक विकास र समग्र यातायात विकासमा योगदान पुग्नेछ ।’

त्यस्तै प्राधिकरणका कार्यकारी निर्देशक कुलमान घिसिङले विद्युतीय सवारी साधानको प्रयोगलाई प्रवर्द्धन गर्न चार्जिङ स्टेसन स्थापना गरिएको बताए । विद्युतीय सवारी साधन पेट्रोलियम पदार्थबाट चल्नेभन्दा १५/२० गुणा सस्तो पर्ने उल्लेख गर्दै घिसिङले यसबाट देशको वैदेशिक मुद्रा सञ्चितिमा पनि सकारात्मक योगदान पुग्ने बताए । प्राधिकरणले देशभर थप ५ सय वटा चार्जिङ स्टेसन स्थापना गर्न लागेको उनको भनाइ छ ।

‘आन्तरिक रुपमा विद्युत् खपत बढाउन, पेट्रोलियम पदार्थको खपत कम गरी आयात घटाउन र विद्युतीय सवारी साधन प्रयोगमार्फत वातावरण मैत्री यातायात प्रणालीको विकासका चार्जिङ स्टेसन स्थापना गरिएको हो’ उनले भने ।

चार्जिङ स्टेसन सञ्चालनमा आएका स्थानहरू :

स्थान	जिल्ला	सङ्ख्या
धार्के	धादिङ	२
मुग्लिङ	चितवन	१
साझा सेवा बल्खु	काठमाडौं	२
साझा सेवा पुल्चोक	ललितपुर	१
नेपाल विद्युत प्राधिकरण, रत्नपार्क	काठमाडौं	१
नेपाल पुलिस क्लब, भृकुटीमण्डप	काठमाडौं	१
पारस बसपार्क	चितवन	२
खुर्कोट	सिन्धुली	२
सिन्धुली बसपार्क	सिन्धुली	१
इलाका प्रहरी कार्यालय बर्दिबास	महोत्तरी	२
हरिवन	सर्लाही	२
इनरुवा बसपार्क	सुनसरी	१
प्रहरी पेट्रोल पम्प, लाहान	सिराहा	२
कालिका फ्युल सेन्टर, मालेपाटन, पोखरा	कास्की	२
पर्यटक बसपार्क पोखरा	कास्की	१
दमक बसपार्क	झापा	२
बेलका नगरपालिका	उदयपुर	२
बिर्तामोड बसपार्क	झापा	२
सुर्खेत बसपार्क	सुर्खेत	२
हेटौडा, रातमाटे	मकवानपुर	२
विद्युत प्राधिकरण तालिम केन्द्र खरिपाटी	भक्तपुर	१
प्रहरी पेट्रल पम्प, सामाखुसी	काठमाडौं	२
बेगनास ताल, पोखरा	कास्की	१
बुटवल बसपार्क	रुपन्देही	२
इटहरी	सुनसरी	१
विराटनगर	मोरङ	१
कोहलपुर नयाा बसपार्क	बााके	२
धनगढी	कैलाली	२
त्रिशूली हावा घर	नुवाकोट	१
बट्टार, त्रिशूली	नुवाकोट	१
कुश्मा	पर्वत	१
लमही बसपार्क	दाङ	२
लम्की	कैलाली	१
जम्मा			५१

स्रोत : नेपाल विद्युत् प्राधिकरण