सशस्त्र प्रहरी बल (एपिएफ)पोखरामा जारी प्रथम लायन्स कप आमन्त्रित पुरुष भलिबल प्रतियोगिताको सेमिफाइनलमा 

सशस्त्र प्रहरी बल (एपिएफ)पोखरामा जारी प्रथम लायन्स कप आमन्त्रित पुरुष भलिबल प्रतियोगिताको सेमिफाइनलमा पुगेको छ।

पोखरा रंगशालास्थित बहुउद्देश्यीय कभर्ड हलमा आज भएको खेलमा गण्डकी प्रदेशलाई रोमान्चक खेलमा ३-२ को सेटमा पराजित गर्दै एपिएफले अन्तिम चारमा पुगेको हो।

पहिलो सेट १९-२५ ले गुमाएको एपिएफले दोस्रो सेट २५-१८ ले आफ्नो पक्षमा पारेको थियो। तेस्रो सेट फेरि २३–२५ ले गुमाउन पुग्यो। त्यसपछि एपिएफले उत्कृष्ट पुनरागमन गर्यो।

३ अंकले पछि परेको अवस्थामा एपिएफले चौथो सेटमा लगातार १२ अंक जोड्यो। यो सँगै २५-१४ ले चौथो सेट जित्दै खेल २-२ को बराबरीमा पुग्यो। निर्णायक पाँचौं सेट एपिएफले १५-११ ले आफ्नो पक्षमा पार्यो।

यो सँगै एपिएफ समूह ‘ए’ बाट सेमिफाइनल पुगेको हो। यो समूहबाट इरानको टोली सेमिफाइनलमा पुगिसकेको छ। प्रतियोगितामा ६ टोलीको सहभागिता छ।

प्रतियोगिताको विजेताले ४ लाख ४४ हजार ४ सय ४४ र दोस्रो टोलीले २ लाख ४४ हजार ४ सय ४४ रुपैयाँ प्राप्त गर्नेछ।

सर्वोत्कृष्ट खेलाडीलाई १४ हजार ४ सय ४४ र विधागत तर्फ उत्कृष्ट हुनेहरूलाई ८ हजार ४ सय ४४ रुपैयाँ प्रदान गरिनेछ।