आईपीएलको उपाधि कोलकाता नाइट राइडर्सले जित्यो

काठमाडौं- कोलकाता नाइट राइडर्सले इन्डियन प्रिमियर लिग (आइपिएल)को उपाधि जितेको छ।

फाइनल खेलमा हैदरावादले दिएको ११४ रनको लक्ष्य कोलकाताले २ विकेट गुमाएर १०.३ ओभरमै पूरा गर्‍यो। उपाधि दिलाउने क्रममा कोलकाताका वेंकटेश ऐयरले अर्धशतक प्रहार गरे। उनी २६ बलमा ४ चौका र ३ छक्का प्रहार गरी ५२ रन बनाएर नट आउट रहे।

ओपनर रहमानउल्लाह गुर्बाजले ३२ बलमा ५ चौका र २ छक्का प्रहार गरी ३९ रनको योगदान गरे। हैदरावादका कप्तान प्याट कमिन्स र शहबाज अहमदले १/१ विकेट लिए।

कोलकाताले तेस्रोपटक आइपिएलको उपाधि जितेको हो। यसअघि उसले २०१२ र २०१४ मा उपाधि जितेको थियो।

यस पटकको आइपिएलमा उत्कृष्ट लयमा रहेको हैदरावाद फाइनलमा भने कमजोर देखिएको छ। हैदारावादले यही सिजनमा आइपिएल इतिहासकै सर्वाधिक २८७ रन बनाएर कीर्तिमान बनाएको थियो।