नेपाली पुरुष राष्ट्रिय भलिबल टोलीले काभा पुरुष भलिबल नेसन्स लिगको आफ्नो पहिलो खेलमा मंगोलियासँग पराजित

नेपाली पुरुष राष्ट्रिय भलिबल टोलीले काभा पुरुष भलिबल नेसन्स लिगको आफ्नो पहिलो खेलमा मंगोलियासँग पराजित भएको छ ।

किर्गिस्तानको विस्केकमा आइतबारदेखि शुरु भएको काभा पुरुष भलिबल नेसन्स लिगमा नेपाल मंगोलियासँग ३–१ को सेटमा पराजित भएको हो ।

किर्गिस्तानको विस्केकस्थित चोलपोन एटिए कभर्डहलमा नेपालले मंगोलियालाई सुरुवाती दुई सेटको सुरुवातमा कडा चुनौती पेश गरेपनि त्यही गतिलाई निरन्तरता दिन नसक्दा सेट गुमाउन पुगेको थियो । प्रतिस्पर्धात्मक तेस्रो सेटमा नेपालले अग्रता लिदै प्रतिस्पर्धात्मक नै जित निकाल्न सफल भयो ।

एक समय ९–१४ ले पछि परेको नेपालले लगातार ३ अंक जोड्दै पहिलो सेटलाई १२–१४ को स्थितिमा ल्याउँदै मंगोलियालाई कडा चुनौती दिँदै खेललाई १७–१९ को स्थितिमा ल्याएका थिए । तर, त्यसपछि नेपालले थप २ अंक जोड्दा मंगोलियालाई १९–२५ ले नतिजा सुम्पन पुग्यो ।

दोस्रो सेटमा पनि कडा चुनौती दिएपनि १२–१२ को स्थितिबाट पछि परेको नेपालले मंगोलियालाई २०–२५ ले नतिजा सुम्पन पुग्यो । प्रतिस्पर्धात्मक तेस्रो सेटमा नेपालले १२–१२ को बराबरीबाट अग्रता लिदै एक समय २०–१५ को आरामदायी अग्रतासहित जिततर्फ अघि बढेको थियो ।

मंगोलियाले पूनरागमन प्रयास गर्र्दै खेललाई २४–२४ को बराबरीमा ल्याएपनि नेपालले २७–२५ ले सेट जित्न सफल भयो । चौथो सेटमा सुरुवातदेखि नै पछि परेको नेपालले पूनरागमन प्रयास गरेपनि खेलमा फर्कन नसक्दा नतिजा २०–२५ ले सुम्पन पुग्यो ।

राउन्ड रोविन लिगको आधारमा हुने खेलमा नेपालले अब सोमबार किर्गिस्तान, मंगलबार इरान, बिहीबार तुर्केमिनिस्तान, शुक्रबार किर्गिस्तानको अर्काे टोली तथा त्यसपछि आइतबार उज्वेकिस्तानसँग खेल्नेछ ।