९ असोज, काभ्रेपलाञ्चोक । अविरल वर्षाका कारण काभ्रेपलाञ्चोकमा कांग्रेसको क्षेत्रीय अधिवेशन स्थगित भएको छ ।
नेपाली कांग्रेसको १५ औं महाधिवेशन अन्तरगत प्रतिनिधिसभा क्षेत्र २ काभ्रेपलाञ्चोकले असोज ९ गतेका लागि तोकिएको मनोनयन र असोज १० का लागि तोकिएको प्रदेश सभा एवं प्रतिनिधिसभा क्षेत्रीय अधिवेशन स्थगित भएको हो ।
क्षेत्रीय सभापति महेश खरेलका अनुसार थप केही दिन वर्षा कायम रहने हुँदा सतर्क रहन मौसम विभाग लगायत विभन्न निकायले सूचना जारी गरेको र नेपाली कांग्रेसको केन्द्रीय समितिले समेत मौसमको अवस्था हेरी असोज १३ गतेभित्र गरिसक्ने गरी दिएको म्यान्डेड अनुसार अधिवेशन स्थगित गरिएको बताए । उनले अधिवेशनका लागि अर्को सूचना प्रकाशन गरेर जानकारी दिइने बताए ।
क्षेत्र नम्बर १ को अधिवेशन पनि स्थगित गर्ने तयारी
दुई क्षेत्र रहेको काभ्रेको प्रतिनिधिसभा क्षेत्र नम्बर १ को अधिवेशन पनि स्थगित गर्ने तयारी छ । त्यसबारे निर्णय गर्न आज बैठक बस्दै छ । क्षेत्र नम्बर १ का सभापति दिनेश लामाले अहिले १० बजे बस्ने पदाधिकारीको बैठकले अधिवेशनबारे निर्णय लिने जानकारी दिए ।
उनका अनुसार ११ गतेसम्म नै वर्षाको सम्भावना रहेकोले अधिवेशन स्थगित हुनसक्ने बताए ।
