अविरल वर्षापछि बाढीपहिरो प्रभावितलाई राहत वितरण सुरु

सरकारले असोज १७–१९ गते परेको अविरल वर्षापछि आएको बाढीपहिरोबाट घरबास गुमाएकालाई तत्काल अस्थायी आवास निर्माणका लागि अनुदान दिने निर्णय गरेको छ। मृतकका परिवारलाई दुई लाख र बेपत्ताका परिवारलाई राहत उपलब्ध गराइने छ। घरबास गुमाएकालाई अस्थायी आवास निर्माणका लागि ५० हजार रुपैयाँ अनुदान दिइनेछ भने स्थायी आवासका लागि हिमालमा पाँच लाख, पहाडमा चार लाख र तराईमा तीन लाख रुपैयाँ उपलब्ध गराइनेछ।

बैठकले घाइते ४७ जनाको निःशुल्क उपचार गर्ने, बेपत्ता व्यक्तिको खोज र उद्धार जारी राख्ने, सडक, खानेपानी, विद्युत्, सञ्चारलगायतका अत्यावश्यक सेवा सञ्चालन गर्ने र महामारी रोकथामका लागि जनचेतना तथा स्वास्थ्य कार्यक्रम सञ्चालन गर्ने निर्णय पनि गरेको छ।

प्रधानमन्त्री सुशीला कार्कीको अध्यक्षतामा बसेको बैठकमा विपत् व्यवस्थापन, राहत वितरण र सुरक्षा निकायहरूको समन्वयमा कार्ययोजना अघि बढाउने निर्णय भएको राष्ट्रिय विपत् जोखिम न्यूनीकरण तथा व्यवस्थापन प्राधिकरणले जानकारी दिएको छ।