साइप्रसको डढेलोमा दुई जनाको मृत्यु, ४४ डिग्री सेल्सियस तापक्रमको अनुमान

गोपाल तिम्सिना (लिमासोल, साइप्रस-संवाददाता) : साइप्रसको दक्षिणी भेगमा फैलिएको भीषण डढेलोमा परेर दुई जनाको मृत्यु भएको छ। बुधबार दिउँसो लिमासोल जिल्लाको मालिया गाउँमा सुरु भएको आगलागीका कारण जलेको एक सवारीसाधनभित्र दुई जनाको शव फेला परेको साइप्रस प्रहरीले जनाएको छ।

शवको औपचारिक पहिचान हुन बाँकी रहे पनि, स्थानीय सञ्चारमाध्यमका अनुसार ७७ वर्षीया एक महिलाको हराएको भनिएको कारमा शव फेला परेको हो। मृतकहरू सोही क्षेत्रका एक वृद्ध दम्पती भएको अनुमान गरिएको छ।

आगलागीका कारण एक दर्जनभन्दा बढी मानिस घाइते भएका छन् भने धेरै घरहरू जलेर नष्ट भएका छन्। डढेलोले करिब १०० वर्ग किलोमिटर (४० वर्ग माइल) जमिनलाई सखाप पारेको छ।

डढेलो नियन्त्रणका लागि २५० भन्दा बढी अग्निनियन्त्रक खटिएका छन्। उच्च तापक्रम र तीव्र हावाका कारण आगो थप फैलिएको थियो। साइप्रसको मौसम विभागले बिहीबारका लागि अत्यधिक तापक्रमको चेतावनी जारी गरेको छ, जसअनुसार भित्री क्षेत्रमा तापक्रम ४४ डिग्री सेल्सियससम्म पुग्ने अनुमान गरिएको छ।

साइप्रस अग्नि सेवाका प्रवक्ता एन्ड्रियास केटिसले डढेलोमा “सक्रिय मोर्चा” नभए पनि क्षेत्रमा “फ्लेयर-अप” जारी रहेको बताएका छन्। आगलागीका कारण धेरै समुदायमा बिजुली र एयर कन्डिसनिङको समस्या भएको छ।

कान्दोउका एक बासिन्दा एन्टोनिस क्रिस्टोउले एएफपी समाचार एजेन्सीलाई भने, “जब म आफ्नो घरभित्र प्रवेश गरेँ, मैले पूरै पहाड र उपत्यका आगोको लप्काले ढाकेको देखेँ। म रोएँ, साँच्चै म रोएँ, किनकि मानिसहरू जलेका छन्।”

साइप्रस सरकारले छिमेकी देशहरूसँग अग्निनियन्त्रणका लागि सहयोग मागेको छ। युरोपेली संघको नागरिक सुरक्षा संयन्त्रमार्फत साइप्रसले सहयोगको अनुरोध गरेको छ। सरकारी प्रवक्ता कोन्स्टान्टिनोस लेटाइमबियोटिसका अनुसार स्पेनले बिहीबार दुईवटा विमान पठाउने अपेक्षा गरिएको छ। न्यायमन्त्री मारियोस हार्ट्सिओटिसले सार्वजनिक प्रसारक साइबीसीलाई जोर्डनमा दुईवटा अग्नि नियन्त्रक विमान तयारी अवस्थामा रहेको र स्पेनबाट थप दुईवटा विमान आउने अपेक्षा गरिएको बताएका छन्।

आगलागी जानाजानी लगाइएको हुनसक्ने अनुमान गरिएको छ र यससम्बन्धी साक्षीका बयान प्रहरीलाई बुझाइएको छ। युरोपमा यो गर्मीमा तीव्र गर्मीको लहर चलेको छ, जसका कारण ग्रीसको क्रेट टापु, टर्की र स्पेनमा पनि डढेलो लागेको छ। खडेरीको सामना गरिरहेको साइप्रसलाई गर्मी महिनाहरूमा डढेलोले नियमित रूपमा सताउने गर्दछ।

सन् २०२१ मा पनि लिमासोल जिल्लामा करिब ५५ वर्ग किलोमिटर (२१ वर्ग माइल) क्षेत्र जलेको डढेलोमा चार जना इजिप्शियन कृषि मजदुरको मृत्यु भएको थियो।