बालोन डी’ओर जित्दै स्पेनिस मिडफिल्डर रोड्री बने विश्वकै उत्कृष्ट खेलाडी

अक्टोबर २९, आशिष लामिछाने।  स्पेनिस मिडफिल्डर रोड्रीले फुटबलको प्रतिष्ठित अवार्ड बालोन डी’ओर जित्दै विश्व फुटबलको उत्कृष्ट खेलाडीको उपाधि आफ्नो पक्षमा पारेका छन्। २८ वर्षीय रोड्रीले म्यानचेस्टर सिटीलाई चौथोपटक प्रिमियर लिग जिताउन र युरोकप २०२४ मा स्पेनलाई ऐतिहासिक जित दिलाउन महत्त्वपूर्ण भूमिका निभाएका थिए। पहिलो पटक बालोन डी’ओर जितेका रोड्रीको करियर यसवर्ष उल्लेखनीय रह्यो, जसका कारण उनी यो प्रतिष्ठित अवार्ड हात पार्न सफल भए।

रोड्री सन् २०१९ मा स्पेनिस क्लब एथलेटिको मड्रिडबाट इङ्ग्लिस क्लब म्यानचेस्टर सिटीमा अनुबन्धित भएका थिए। उनको नेतृत्व र उत्कृष्ट मिडफिल्ड प्रदर्शनले सिटीलाई न केवल प्रिमियर लिगमा सफल बनाएको छ, बल्कि युरोपेली प्रतियोगिताहरूमा समेत सशक्त बनाएको छ। यस वर्ष युरोकपमा स्पेनको ऐतिहासिक जितमा उनको भूमिका अत्यन्त प्रभावशाली थियो, जसले उनलाई यो अवार्डको लागि उत्कृष्ट दाबेदार बनायो।

अवार्ड समारोहमा स्पेनिस क्लब रियल मड्रिडले भने सहभागी हुन अस्वीकृत गर्‍यो। रियलका खेलाडी भिनिसियस जुनियरलाई बालोन डी’ओरको प्रमुख दाबेदार मानिएको थियो, जसले क्लबलाई स्पेनी ला लिगा र युरोपेली च्याम्पियन्स लिगमा सफलता दिलाएका थिए। तर, भिनिसियसले दोस्रो स्थानमा चित्त बुझाउनुपर्‍यो। आक्रामक मिडफिल्डर जुड बेलिङ्घम तेस्रो स्थानमा, र रियलका अर्का खेलाडी डानी कार्भाजल चौथो स्थानमा रहे। रियलले आफ्नो खेलाडी भिनिसियसले अवार्ड नजित्ने पक्का भएपछि, पेरिसमा आयोजित उक्त कार्यक्रमलाई केही घण्टाअघि बहिष्कार गरेको थियो।

रोड्रीको यो जितले फुटबलमा उनका योगदान र महत्त्वलाई स्पष्ट रूपमा उजागर गरेको छ, जसले उनलाई विश्व फुटबलका सबैभन्दा उत्कृष्ट मिडफिल्डरमध्ये एक बनाएको छ।