हरक साम्पाङ र बालेन्द्र शाहको नाम अघि सार्ने युवाहरूको मागपछि आन्दोलनमा तनाब

काठमाडौं, भदौ २५

बुधबार दिनभरको छलफलपछि जेनजेड आन्दोलनका प्रतिनिधिहरूले नेपालकी पहिलो महिला प्रधानन्यायाधीश सुशीला कार्कीलाई अन्तरिम सरकारको नेतृत्वका लागि आफ्नो उम्मेदवारका रूपमा अघि सारेका छन्।

तर साँझतिर केही युवा समूहले काठमाडौंको भद्रकालीस्थित जंगी अड्डा अगाडि भेला भई धरानका मेयर हरक साम्पाङ वा काठमाडौंका मेयर बालेन्द्र शाहलाई विकल्पका रूपमा अगाडि सार्न माग गरे। सो क्रममा जेनजेडका प्रतिनिधिहरू नेपाली सेनाका प्रमुख अशोकराज सिग्देलसँग छलफलमा रहेका थिए।

‘हामी नेपाल’ नामक समूहले सामाजिक सञ्जालमार्फत शाह स्वयंले पनि कार्कीको नाम समर्थन गरेको जानकारी सार्वजनिक गरेपछि परिस्थिती शान्त भएको थियो। तर बिहीबार बिहानदेखि नै विभिन्न भ्रामक सूचना, अज्ञात समूहबीचका झडप र जेनजेडको प्रतिनिधित्वबारे दाबी–प्रतिदाबीले वातावरण फेरि तनावपूर्ण बनेको छ।

‘जेनजेड नेपाल’ नाममा भ्रामक प्रेस विज्ञप्ति जारी गर्दै लोकप्रिय ऊर्जा प्राधिकरणका पूर्व कार्यकारी निर्देशक कुलमान घिसिङलाई समर्थन गरेको दाबी गरिएको थियो। तर पछि उक्त विज्ञप्ति नक्कली भएको खुलेको छ।

त्यसैबीच, विभिन्न डिजिटल प्लेटफर्ममा जेनजेड आन्दोलनकारीहरू आपसमा भिडेको झल्किने भिडिओहरू प्रसारित भए। तर जेनजेडकी युवा अभियन्ता आस्था सुवेदीले ती भिडिओमा देखिएकाहरू वास्तविक जेनजेड सदस्य नभएको बताइन्।

“सच्याएर हेर्ने हो भने ती भिडिओमा देखिएका व्यक्तिहरू जेनजेड पुस्ताका होइनन्। हाम्रो आन्दोलनलाई अवसरवादी समूह र बाह्य शक्तिले बदनाम गर्न खोजिरहेका छन्,” सुवेदीले भनिन्।

पत्रकारिता अध्ययनरत विद्यार्थी आदित्य खरेले पनि गलत सूचना र गैरजिम्मेवार रिपोर्टिङका कारण आन्दोलनलाई विभाजित देखाउन खोजिएको टिप्पणी गरे।

‘हामी नेपाल’ का प्रवक्ता रेहानराज डंगोलले जेनजेड आन्दोलनमा कुनै प्रकारको कलह नरहेको स्पष्ट पारे। उनले प्रतिनिधिहरूले नेतृत्वका लागि होडबाजी गरेको वा संविधान विरोधी एजेन्डा लिएको भन्ने दाबीलाई ‘अवसरवादीहरूको षड्यन्त्र’ भन्दै खारेज गरे।

सुदन गुरुङ नेतृत्वको ‘हामी नेपाल’ ले बिहीबार विहान विज्ञप्ति जारी गर्दै विभिन्न ठाउँमा भएका प्रदर्शन आफ्नो समूहले आयोजना नगरेको स्पष्ट पारेको थियो। गुरुङले रिपोर्टर्स क्लबमा आयोजित पत्रकार सम्मेलनमा भने, “हामी राष्ट्र निर्माणको सपना बोकेर काम गरिरहेका छौं, तर केही अवसरवादी शक्तिहरूले आफ्नै एजेन्डा अघि सारिरहेका छन्।”

जेनजेडकी कानून विद्यार्थी अञ्जली शाहले आन्दोलनमा विचार भिन्नता भए पनि वास्तविक झगडा नभएको बताइन्। “विविध विचार हुनु लोकतन्त्रको स्वाभाविक प्रक्रिया हो,” उनले भनिन्।

फिलहाल, जेनजेड प्रतिनिधिहरू कार्कीको नेतृत्वमा एकताबद्ध रहेको बताइन्छ। तर आन्दोलनको नाममा बाह्य शक्तिले भ्रामक प्रचार र गलत गतिविधि गरिरहेकाले यसको भविष्यमा ऐक्यबद्धता कति कायम रहन्छ भन्ने प्रश्न भने अझै खुला छ।